Dumanon iti P503 million a tax, fee, ken royalty ti binayadan dagiti mining industry iti rehiyon Cordillera idi tawen 2023 kas maibasar iti datos ti Mines and Geosciences Bureau-Cordillera.
Para iti kaudian a datos idi napalabas a tawen ket manarimaan paylaeng ti pannangisimpa dagiti empleyado iti nasao a departamento.
Malaksid iti dayta, dumanon met iti P12 million ti mineral local sales wenno exports dagiti mining industry iti rehiyon Cordillera, P13.5 billion ti mineral production, ken P4.6 billion agingga ita a tawen ti mining investments.
Inyunay-unay met ti nasao nga ahensya a mangipatpatungpal ti mining industry iti rehiyon kadagiti nagduduma a social development ken environmental protection wenno rehabilitation.
Maibasar iti datos dagitoy, mangipatpatungpalda iti environment protection ken enhancement program nu sadinno nakabusbosda iti P4.9 billion idi tawen 2023, community development program a dumanon iti P2.3 million, ken social development and management program nga addaan iti pondo a P159.7 million.
Malaksid iti dayta, nangimula dagitoy iti 2,238 Benguet Pine seedlings iti 25.19 hectares idi tawen 2023 kas paset ti mining forest program dagitoy.
