Inaprobaran dagiti opisyal idiay Nueva Vizcaya ti ordinansa a mangipaay iti P50,000 kadagiti agassawa a dimmunon iti lima pulo a tawen ken nangatngato manipud iti nagkasar dagitoy.
Maawaagan daytoy kas “Enduring Devotion Award” no sadino maipaayan iti insentibo dagiti 50 years a kasar wenno nasursurok pay kasta met dagiti indigenous people apaman a mapaneknekan dagitoy a karamanda iti tribo iti uneg ti 50 years ken nasursurok pay.
Maysa kadagiti kasapulan tapno maipaayan iti nasao nga insentibo ket kasapulan a nasayaat ti langen-langen dagiti agassawa ken awan ti kaso dagitoy a violence against women and their children(VAWC), sangapulo a tawen nga agnanaed iti nasao a lugar ken dagiti agassawa nga awan ti panggepna nga agsina.
Gapu iti daytoy, naguyuguy dagiti agassawa sadiay a nangbiruk kadagiti marriage certificate-da manipud kadagiti nakalemmeng a baul dagitoy.//Rose
