BAGUIO CITY – Agpapaimbagen ti agkabsat a lallaki a binagbagsol ti nakemmeg a suspek iti insidente a napasamak iti maysa a pagadalan sadiay Ansagan, Tuba, Benguet.
Nabigbig dagiti biktima a da Jasper Fusilero, 22-anyos, baro, laborer ken Carlos Fusilero, 41-anyos, karpintero, agpada a tubo ti Villamor, Cabarroguis, Quirino.
Nabigbig met ti suspek a ni Jucarlo Cabalteja, adda iti legal age, tubo ti Gomez, Cabarroguis, Quirino.
Sigun iti pulisya, agin-inom iti arak dagiti tallo idi timmaud ti saan a panagkinna-awatan da Cabalteja ken Carlos Fusilero.
Ginandat met ni Jasper Fusilero nga anawaen ken pakalmaen dagiti dua.
Nupay kasta, killaat nga inruar ni Cabalteja ti maysa a kutsilyo ken sadiay a binagbagsolna dagiti biktima.
Dagus met a naitaray iti ospital dagiti agkabsat bayat a nakemmeg ti suspek.
