Pimmusay ti maysa a construction worker gapu iti panakakuryentena kabayatan ti panagtrabahona idiay Alta Verde Subdivision, Tadiangan Tuba Benguet idi February 25.
Ti lalaki a pimmusay ket agtawen iti 19, awanan iti asawa, ken residente iti Mabini, Alaminos, Pangasinan.
Maibasar iti imbestigasyon dagiti kameng ti pulisya, agibunbunag daytoy iti 25 mm nga steel bar manipud iti ground floor agingga iti 4th floor kadwa ti maysa pay a construction worker nga agtawen met iti 49 a residente iti Suello Village, Bakakeng Central, Baguio city.
Sigun iti imbestigasyon, bayat a guyguyuden ti lalaki dagiti landok ket naisagid ti murdong daytoy ti high tension wire ti Benguet Electric Cooperative a nangitunda metten iti panakakuryentena.
Sigun iti kadwa ti pimmusay nga isu metlaeng a nakaimatang iti insidente, naawanan iti puot ti lalaki ken naiturong a dagus daytoy iti Baguio General Hospital and Medical Services.
Nupay kasta, indeklara ti attending physician a dead on arrival daytoy gapu iti sudden cardiac arrest secondary to electrocution.
Naipakaammo metten ti insidente iti pamilya ti pimmusay ken iti agdama ket naiyawiden ti bangkay daytoy idiay Pangasinan.
Kabayatanna, silulukat met dagiti katrabahoan ti pimmusay ken ti boss daytoy a tumulong para iti panakaimansayagna.//Bombo Noveh Organo
