Impakaammo ni Atty. Stephen David a dinakamat kenkuana ni sigud a Bamban, Tarlac Mayor Alice Guo a kayatna a sumuko ngem maamak para iti kinatalgedna iti naudi a panagsaritada idi Agosto 22, iti agdama a tawen.
Nupay kasta, agtaltalnaed a mangnamnama ni Atty. David a makombinsir ni Guo a sumuko ita a makitana ti seguridad a maipapaay iti kabsatna a ni Shiela, kalpasan a nakemmeg daytoy idiay Indonesia idi Agosto 21.
Malaksid iti dayta, inaklon pay ni Atty. David a nakisaritana ti kabsat ni Guo a ni Wesley itay kanikadwa, no sadino dinamagna ti kasasaad ti kabsatda a ni Shiela ken no kasano ti pannakaituloy ti kaso ngem saanna a dinakamat ti lokasion daytoy.
Kabayatanna, nakasagana ti kampo ti Guo a mangsango iti baro a kaso a money laundering nga impila iti Department of Justice babaen ti National Bureau of Investigation, Presidential Organized Crime Commission, ken ti Anti Money Laundering Council.
