Nasarakanen ti maudi a bangkay ti maysa a biktima iti vehicular accident a napasamak sadiay Gawa, Barangay Tocucan, Bontoc, Mountain Province.
Nasarakan ti bangkay daydi Edmund Romeo, a taga-Pangasinan, iti pasado alas-4 ti malem idi kalman.
Immuna metten a nasarakan ti bangkay daydi Carlo Ancheta idi Martes.
Naiyawid metten dagiti bangkay dagiti tallo a kadwada a da Rogelio Dela Cruz Jr, JC Galicia, agpada a residente ti Pangasinan ken ni Zoren Jay Alat, driver, manipud Zamboanga.
Maipalagip a nagdiretso a natnag ti elf truck a nagluganan dagiti biktima iti rangkis nga addaan kauneg a 150-170 metro agingga a nalned iti Chico River, kalpasan a naidungpar iti dua a lugan a nakaparada iti igid ti kalsada idi Oktubre 27, 2025.
Kabayatanna, naipatungpal ti ritual iti ground zero idiay Gawa, Barangay Tocucan, Bontoc, Mountain Province.
Kasaruno daytoy iti balligi a pannakarekober ti bangkay ti maudi a biktima.
Panggep ti ritual a maikararag a madalusan ti panunut dagiti nakakita iti insidente, partikular dagiti rescuers ken tapno maikkat dagiti aniaman a negatibo wenno trauma ken dadduma pay.
Naiyawid met daytoyen iti pagtaenganda sadiay Pangasinan.
