Tingtingitingin paylaeng ni sigud a Philippine National Police(PNP) chief General Nicolas Torre III dagiti sumaruno nga adadng daytoy bayat nga umadanin ti panagretirona iti serbisyo iti kapulisan.
Sigun kenni Torre, saan pay a nakapangngeddeng daytoy ngem maysa kadagiti panggepna nga idauloan ti pananglaban iti bullying a maysa kadagiti personal nga adbokasiyana.
Manarimaan ti panangorganisar ni Torre iti anti-bullying fun run a mapangpanggep a maangay inton November 16 idiay Santa Rosa, Laguna.
Sigun iti sigud a dadaulo iti kapulisan, naadaan daytoy iti oras tapno maipaayan iti atensyon dagiti banag a naasideg iti pusona kas ti anti-bullying gapu ta inaklonna nga uray idi maysa daytoyen nga opisyal a nangato ti saadna ket mabikbiktima paylaeng iti nasao a klase iti kinaranggas.
Inlawlawag ni Torre a panggep ti nasao nga aktibidad a makaipaay iti panakammo seknan iti epekto iti bullying iti emosyonal ken psychological nga aspeto nangruna kadagiti agtutubo.
Kabayatanna, kinumpirmar ni Torre nga awan pay ti pormal nga indiaya kenkuana a posisyon iti agdama nga administrasyon.
