BAGUIO CITY – Nadiskobre dagiti otoridad ti naabandona a kampo ti rebelde a New People’s Army (NPA) iti nagbaetan ti Bantey, Tadian; Banguitan, Besao ken Balintaugan, Bauko sadiay Mountain Province.
Maibasar iti report, nadiskobre ti nasao a kampo kabayatan ti Major Internal Security Operation dagiti personnel ti 1st Mountain Province PMFC, 2nd MPPMFC, NISG-NL, Bauko MPS, 143SAC 14SAB, RIU 14, PIU Mountain Province, RID PROCOR, EOD/K9 PECU-MP ken operating troops ti Platoon 1 ken Platoon 2 nga idadauluan da PLt. Julius Yaos ken PLt. Roderick Palco iti sidong ti over all supervision ni PCol. Ruben Andiso.
Nakumpiskar iti nasao a kampo ti maysa nga improvised anti-personnel mine, 31 a pidaso ti dinamita, maysa a mine container nga addaan ti detonating cord, kable, plastic drum, nagduduma a bado, bagas, asin ken dua a libro ti Batayang Kurso ng Partido.
Nadiskobre pay iti nasao a disso ti dumanon 20 a foxholes wenno abot.
Nangisayangkat pay ti operating troops ti panagsawar iti nasao a disso para iti posible a panakabiruk dagiti dadduma nga improvised explosive devices tapnu maliklikan ti panangsubli dagiti rebelde kadagitoy ken saan a maaramat iti kinaranggas kontra iti tropa ti gobyerno.
