Inarestar dagiti otoridad ti dua a construction worker a residente iti Cypress Irisan, Baguio City gapu iti panaglabsingda iti Animal Welfare Act wenno ti Republic Act 8485.
Naarestar dagiti suspect idiay Lumecneng Nangalisan Tuba, Benguet kasaruno ti panangireport kadakuada ti maysa nga abogado kadagiti kameng iti Tuba Municipal Police Station.
Maibasar iti imbestigasyon, naranaan ti abogado wenno ti legal counsel iti Furvent Animal Rescue and Advocacy Sanctuary dagiti suspect nga addaan iti iggem a puraw a sako.
Naobserbaran ti abogado nga adda ti agkutkuti iti nasao a sako rason a sinaludsodna dagiti dua nu anya ti nilaon ti awit-awitda a sako.
Inaklon met dagiti suspect a maysa nga aso ti nilaon ti sako a sigun metlaeng kadakuada ket maparti koma.
Gapu iti dayta, saan nga intulok ti abogado a maaramid pay dagiti lallaki ti gandatda ken saannan a pinalubusan dagitoy bayat a dagus a nagreport iti kapulisan.
Kasaruno dayta, naipasidong dagiti dua a suspect iti kustodiya iti pulisya nu sadino Php6000 ti kasapulan nga ipiansada para iti panakawaya-wayada.
Balligi met a naipaima ti maparti koma nga aso iti nadakamat nga abogado para iti safekeeping.//Bombo Noveh Organo
