Agkidkiddaw ni Attorney Errol Comafay Jr. iti kararag para iti kinatalgedda iti asawana kalpasan ti maysa a mapagduaduaan nga insidente a napasaran iti asawana idi Enero 27, a sigun kenkuana ket kapada iti pasamak a nangitunda iti ipupusay ti amana.
Iti facebook post ti abogado idi Enero 28, imbinglay ni Comafay—nga itay laeng nabiit ket nabawina ti disqualification iti eleksion idi Mayo 2025 babaen ti Korte Suprema— a simmarungkat ti asawana iti kasinsinna idiay Appas idi rabii ti Martes, ti umuna a gundaway nga agmaymaysa daytoy.
Idi paawid daytoy iti pagtaenganda, nadlawda ti dadakkel a bato a nakakabil iti kalsada. Sigun kenni Comafay, bassit laeng dagiti pagtaengan iti lugar ken dandani awan ti lugan.
Kinunana a nagkedked ti asawana a bummaba iti lugan kalpasan a nalagipna nu kasano a napalpaltugan ken pimmusay ti amana idi bimmaba daytoy tapno ikkaten ti road blockade nga inkabil dagiti suspek.
Gapu iti daytoy, immawag laengen ti asawa ni Comafay iti kasinsinna, a nakasangpat kadua ti maysa a kaarubada tapno ikkaten dagiti bato. Nadlawda metlaeng ti mapagduaduaan a lugan a nakaparada nga asideg iti lugar, nga in-inut a pimmanaw idi immasideg ti kasinsinna ken ti kaarabu.
“Mabuti at alisto ang aking asawa kaya nakaiwas sila sa kapahamakan. Sana isama ninyo kami sa inyong mga panalangin.”
Attorney Errol Comafay Jr.
