BAGUIO CITY – Saan a makipaset ti Baguio-Benguet Public Utility Jeepney Federation iti nationwide tigil-pasada ti Pagkakaisa ng mga Samahan ng Tsuper at Opereytor Nationwide (PISTON) inton Nobyembre 20 agingga Nobyembre 23, iti agdama a tawen.
Iti pannakiuman ti Bombo Radyo kenni Wilson Bumay-et Jr., Presidente ti Baguio-Benguet PUJ Federation, awan ti makitana a rason a makipaset ti Baguio-Benguet iti tigil-pasada uray pay man makaawatda ti imbitasyon.
Kinunana pay nga awan ti negatibo nga ibaga dagiti sumagmamano a miyembro ti PISTON iti Baguio-Benguet para iti pannakipasetda iti nasao a tigil-pasada.
Innayonna ni Bumay-et nga agarup 92% ti nalpasen a nagpa-consolidate iti franchise dagitoy ken sumagmamano laengen ti saan pay a nagpa-consolidate.
Nupay kasta, aw-awisenna met dagiti saan pay a nagpaconsolidate nga agpaconsolidate dagitoy agingga Disyembre 31.
Kabayatanna, inlawlawag ni Bumay-et Jr. a bassit paylaeng ti modernized jeep iti siudad gapu ta nangina ti presyo daytoy ken kasapulan a kitaenda ti de-kalidad a unit.//Bombo Marinel Rodrigo
