Maragsakan ti grupo a Baguio-Benguet Movement against Jepneey Phaseout maipapan iti resolusion nga inaramid dagiti duapulo ket DUA a senador para iti temporario a pannakasuspindir ti implementasion ti Public Utility Vehicle Modernization Program (PUVMP).
Iti interview ti Bombo Radyo kenni Mike Cabangon, convenor ti Baguio-Benguet Movement against Jepneey Phaseout, kinunana a dakkel a tulong daytoy para iti sektor ti transportasion kasta met iti “riding public” gapu ta stakeholders dagitoy a naapektaran iti nasao a programa.
Para kenni Cabangon, kasapulan a pirmaan ni President Ferdinand Marcos Jr. ti resolusion tapno maadal wenno mareview a nasayaat ti nasao a programa gapu ta makaapektar daytoy iti panagbiag nangruna iti sektor iti transportasion.
Sigun pay kenkuana, nasaysayaat a saan a dagos a maiyemplementar ti nasao a programa nu diket in-inot tapno ad-adda a makapag-adjust ti kaaduan.
Kiddawna a saan kuma a maipapilit wenno mapuersa ti panaggatang kadagiti nangingina a lugan tapno laeng makapagpasada, maisubli ti individual franchise dagiti drivers ken operators ken kasapulan kuma a marehabilitate ti nasao a programa.
Patien ni Cabangon a saan a dagiti nakapag-consolidate ti agriri nu diket dagiti agilaklako ti nangingina a lugan kadagiti drayber ken operators gapu ta posible nga awan ti komision wenno matiggedan dagitoy.
Kabayatanna, nangisubmitirin dagiti convenors, opisial, draybers ken operators ti Baguio-Benguet Movement against Jepneey Phaseout ti position paper a mangsuspindir iti Local Public Transport Route Plan iti siudad ti Baguio a manarimaan a maiyemyemplementar wenno masursurot iti agdama.
