BAGUIO CITY- Nakailista itan ti Baguio City iti umuna a kaso ti ipupusay gapu iti sakit a dengue.
Naammuan a naggurigor daytoy idi Enero 16 ken naiturong iti ospital ngem pimmusay daytoy gapu iti pneumonic effusion wenno panakaurnong ti fluid iti lungs-na.
Sigun kenni City Health Services Office (HSO) head Dr. Rowena Galpo, ti pimmusay nga ubing a lalaki ket agtawen iti sangapulo manipud iti City Camp Central barangay.
Ti nasao a pasyente ket addaan iti history of travel sadiay kalinga ken nakitaan daytoy iti sintomas idi pasublidan iti siyudad ti Baguio.
Nagpakonsultar daytoy iti doktor ken ditoy a naduktalan a positibo iti dengue isut gapuna a dagus a naipaayan iti agas ken napaawid.
Nupay kasta, naiturong manen daytoy iti ospital idi Hunyo 19 ken naadmitir daytoy idi Hunyo 21 gapu iti panagdaringungo ti nasao nga ubing ken pimmusay daytoy idi Hunyo 24 gapu iti severe dengue.
Dagiti sintomas ti dengue ket panagbakuar, rashes, sakit ti ulo, panagsakit dagiti nagsusuopan dagiti tultulang, rikna a nabanbannog, ken panagsakit iti likod ti mata malaksid laeng iti panagdaringungo.
Kinuna ni Dra. Galpo a rumbeng nga agpakonsulta a dagus iti doktor no mapasaran dagiti nasao a sintomas.
Maipalagip a ngimmato ti kaso ti sakit a dengue kadagiti 39 a babbarangay iti siyudad ti Baguio.
