BAGUIO CITY – Agtaltalinaed ti kumpiansia ni Baguio Mayor Benjamin Magalong a maka-akomodar ti siudad iti kanayonan a sangaili sakbay ti Paskua.
Kinunana a posible a mailukat ti siudad kadagiti dadduma a rehion ken kadagiti Do it Yourself tours (DIY) tourists la ketdi saan a kumaro ti kaso ti COVID-19 iti lokalidad.
Dinakamatna a ti panakailukat ti turismo iti nagbaetan ti siudad ken dagiti taga-Ilocos Region ket maysa a test para iti Baguio.
Inlawlawagna nga iti kanito a naka-adal ti siudad ket mabalin a ngumato ti kumpiansa ti Baguio a mangakomodar iti kanayonan a turista manipud iti dadduma a rehion.
Sigun pay iti mayor, napateg iti turismo ti siudad ti panakaituloy ti panagbiahe dagiti parapasahero a bus.
Maibasar iti kaudian a datus iti Baguio VISITA, dumanon iti 124 a travel requests ti naawatda, pakairamanan ti 50 manipud Ilocos Region a bukbuklen met ti 29 manipud Pangasinan, 16 manipud La Union, 2 manipud Ilocos Sur ken 3 manipud iti Ilocos Norte.
