Nakasaganan dagiti 118 a police personnel iti siudad ti Baguio para iti panangimanehar iti trapiko kasta metten ti panangkontrol iti kinaadu dagiti tattao kagiddan ti maudi nga aldaw ti 2024 Bar examination a maipatungpal idiay Saint Louis University inton bigat.
Iti interview ti Bombo Radyo kenni PMaj. Harriet Bulcio, pannakangiwat ti Baguio City Police Office, maideploy dagitoy kadagiti drop off ken pick-up points kadagiti gate iti nasao a pagadalan bayat nga adda met dagiti nagserbi kas area security kadagiti waiting area.
Malaksid iti dayta, adda metlaeng dagiti quick reaction team dagitoy nga agresponde iti kanito nga adda ti mapasamak a saan a nasayaat nga insidente.
Kinunana, nga adda metlaeng dagiti volunteers a kadua dagitoy pakairamanan dagiti medical team manipud iti Municipal Disaster Risk Reduction Management Office, dagiti otoridad manipud iti Bureau of Fire Protection ken dadduma pay.
Namnamaen pay ni Ayangwa nga adda dagiti pamilya ken kakabagyan dagiti examinees a mangitulod kadakuada rason a kasapulan ti seguridad dagitoy.
Pinagyamananna met dagiti amin a timmulong kadakuada idi napalabas a dominggo iti umuna nga aldaw ti nasao nga eksaminasyon gaputa naballigi a naipatungpal daytoy.
