--Ads--
ABRA PROVINCE – Nasarakan ti dua a bangkay ti lalaki iti igid ti kalsada idiay Sitio Pasikad, Barangay Bonglo, Licuan-Baay a paset ti Abra ken Kalinga road.
Nabigbig dagitoy a da Alex Borreta ken ti anakna a ni Richard Borreta, 17-anyos, residente dagitoy ti Barangay Agtangao,Bangued.
Maibasar iti agtultuloy nga imbestigasyon dagiti otoridad, nasarakan ti tama ti paltog kadagiti biktima ken nadunor ti tengged dagitoy.
Iti agdama, manarimaan ti nainget nga imbestigasyon dagiti otoridad tapno maduktalan ti rason ken suspek iti nasao nga insidente.
Nakamansayag ti bangkay dagiti agama iti Joces Funeral Homes sadiay Tayum, Abra.
