BAGUIO CITY – Nadiskobre ti bangkay ti maysa a karpintero a nakadasay iti uneg ti pagtaengan dagitoy sadiay Sitio Liyang, Umalbong, Hingyon, Ifugao itay agsapa.
Nabigbig ti biktima a ni ALFONSO OYYOY HUMIDING, 44-anyos, naasawaan a karpintero ken residente ti Sitio Liyang, Umalbong, Hingyon, Ifugao.
Maibasar iti report, inyuman ti Kapitan ti nasao nga barangay ti nasarakan a bangkay ni Humiding kadagiti otoridad idi 4:40 ti agsapa idi kalman.
Dagus a nirespondeanda daytoy ken naamoan nga immuna a nadiskobre ti asawa ti biktima ti nasao nga bangkay a nakadasay a dara-dara ken nakitada ti sugat iti nagilitan a tengnged daytoy.
Iti inisyal a panakiyuman dagiti otoridad a nagresponde iti asawa ti biktima, naamoan nga nag-iinom idi malem kalman, May 22, 2022 da Humiding ken dua a kakadwana a nabigbig nga agnagan iti Jerry Munyobda ken Ricky Indopia, agpada a residente ti Umalbong, Hingyon, Ifugao iti daan a pagtaengan ti biktima agingga iti rabii.
Iti oras met ti 3:25 itay parbangun, nagtaud iti baru nga balayda nga asideg iti pagininoman da Humiding ti asawan tapnu mangipatulod koma iti ules iti asawana idi nadiskobrena a nakasaday ti asawana a dara-dara.
Dagus a sinukimatna ti asawana ken ditoyna a nakita ti sugat iti tengnged ti biktima a posible a rason ti dagus nga ipupusayna.
Agtultuloy met ti imbestigasyon dagiti kameng ti Hingyon Municipal Police Station iti napasakam nga insidente.
