Nainget a banbantayan dagiti otoridad ti Camp 1, Acupan, Virac, Itogon, Benguet kalpasan a nargaay ti paset ti bantay a pag-us-usukan dagiti minero sadiay idi laeng kalman tapno awan ti makastek iti daytoy.
Iti panakiuman ti Bombo Radyo kenni Engr. Cyrill Batcagan iti Municipal Disaster Risk Reduction and Management Office-Itogon kinunana a banbantayanda ti nasao a lugar agsipud ta agtultuloy paylaeng ti panagtennag ti daga ken bato sadiay.
Gapu iti dayta, kinunana a narisgo ti sumrek iti pagusukan agsipud ta possible pay nga agregaay daytoy.
Sigun kenkuana, nargaay ti nasao a bagyo agsipud ta nangato ti slope daytoy, awanan iti mula a kayo ken adda pay dagiti usok iti uneg ti nasao a bantay rason a linmukneng metten ti daga.
Kagiddan dayta, kinunana a natalged ti kasasaad dagiti 138 a minero kalpasan a nakaruarda iti uneg ti pagusukan iti baet ti napasamak a panagreggaay ti daga.
Adda met dagiti naapektaran iti panagregaay ti daga ngem nagbakwiten dagitoy iti natalged a lugar.
Kabayatanna, nagpalagip daytoy kadagiti umili ken dagiti minero a pagbalinen nga adal ti nasao nga insidente tapno maliklikan ti aksidente.
