BAGUIO CITY -Impaulog ti lokal a gobyerno ti Baguio dagiti pagalagadan iti panakaisayangkat ti fireworks display ditoy siudad a kadawyan a paset ti panakapasangbay ti Baro a Tawen.
Sigun kenni Engr. Charles Carame, dadaulo ti Sanitation Division ti City Health Services Office, addan ti naawatda a letter of request para iti panakaipatungpal ti fireworks display iti maysa a mall, maysa a hotel ken sadiay Melvin Jones.
Dinakamatna nga adda ti naipaulog a pammilin ti mayor ti siudad seknan iti proseso ti panakaipatungpal daytoy.
Kinunana a nasken a maipanagan iti mayor ti nasao a letter of request tapnu ti mayor iti mangamong a mangiyendorso iti City Health Services Office ken Sanitation Division para iti inspection ti venue.
Innayonna a nasken a 70% capacity laeng iti maipalubos nga agbuya kadagiti venue
Sigun pay kenni Engr. Carame, maysa laeng nga oras wenno nababbaba ti maipaay a gundaway para iti panakaipatungpal ti fireworks display daytoy tapnu maliklikan ti panakapataud ti napuskol unay nga asok a posible a makaitunda ti saan a napintas nga epekto iti salun-at ken iti aglawlaw.
Mainaig iti dayta, mangnamnama met ni City Epedimiologist and Survailance Unit Officer Ruby Marie Magsino a magun-od latta ti syudad iti zero injuries gapu ti paputok ita a tawen.
Sigun kenkuana, iti las-od ti dua a tawen a panakaipawil ti paputok ditoy Baguio ket dua metten a tawen nga awan ti nailislistada a nadangran gapu iti daytoy.
Nupay kasta, kinunana a nakikoordinarda metten kadagiti nagduduma a pagagasan iti syudad tapnu agsaganada latta kadagiti posible nga aksidente gapu ti paputok a mailista inton panakarambak ti Baro a Tawen.
