BAGUIO CITY – Naibalud ti maysa a baro bayat a naipaima iti DSWD ti kadwana a menor de edad kalpasan a natiliwda idi ginandatda a takawan ti maysa nga establishimento sadiay General Luna, Baguio City idi kanikadua.
Nabigbig ti baro a ni Arnold Yago Awat, 26-anyos, tubo ti Kalinga ken residente ti Irisan, Baguio City.
Maibasar iti report ti pulisya, simrek dagiti suspek iti establishimento ken nagalada kadagiti nagduduma nga electronic supplies.
Rimwarda iti establishimento ngem idi dinamag ti security guard ti resibo dagiti ginatangda ket awan maipakita dagiti dua.
Nakumpiskar manipod kadagiti suspek ti innem a flashlight nga aggatad amin ti P645.
Inyuman ti gwardiya iti pulisya ti napasamak nga insidente a nagresulta iti panakakemmeg dagiti suspek. (-with Bombo Nikki Agsiweng)
