BAGUIO CITY- Irekreklamo manen dagiti sumagmamano a miembro ti Blessed Association of Retired Persons (BARP) Foundation Inc. idiay Bokawkan Road, Baguio City.
Iti interview ti Bombo Radyo, kinuna da Rosalina Biano ken Romana Laos, madanagan dagitoy nga awan ti maalada manipud iti nasao nga asosasyon nu dumteng ti panawen a pumusayda.
Sigun kadagitoy, agarup dua pulo a tawenen a miembroda iti Blessed Association of Retired Persons (Barp) Foundation Inc. ken regular ti panagbayadda iti kontribusyon.
Nupay kasta, kidkiddawen dagitoy iti nasao nga asosasyon nga isublida laengen kadakuada dagiti imbaybayadda gapu ta naduktalanda a ginasgasut a miembro ti saan a naipapaayan ti benepisyo.
Maipalagip a nakapatang ti Bombo Radyo ti Blessed Association of Retired Persons (Barp) Foundation Inc. itay kallabes kalpasan a sumagmamano metlaeng a miembro ti nagreklamo.
Sigun kadagiti opisyales ti nasao nga asosasyon, naapektaran dagitoy idi COVID-19 pandemic gapu ta dadduma a miembro a saan a regular nga agbaybayad ken saan a nagbaybayad ti kontribusyon.
Gapu iti daytoy, plano dagiti opisyales nga ilako ti pasdek ti Blessed Association of Retired Persons (Barp) Foundation Inc. tapno mabayadan dagiti miembro.
Nupay kasta, impetteng da Rosalina ken Romana a saan a rumbeng a mailako ti nasao a pasdek gapu ta kukua daytoy dagiti miembro.
Kabayatanna, padasen met ti Bombo Radyo nga alaen manen ti dasig ti nasao a kooperatiba maipapan iti nasao a pakaseknan.
