BAGUIO CITY- Maal-alarma ti Benguet General Hospital (BeGH) iti nangato a mortality rate wenno bilang dagiti COVID-19 patient matmatay tunggal aldaw.
Dinakamat ni Dr. Meliarazon Dulay, Chief ti Benguet General Hospital a dumanon iti uppat nga ipupusay ti kangatoan a nailista iti uneg laeng ti maysa nga aldaw bayat a maysa agingga dua ti kababaan a mailislista dagitoy.
Inlawlawagna a nakapasar ti COVID-pneumonia wenno high risk pneumonia dagiti natay a pasyente nu sadinno saan dagitoy a makaanges.
Impaganetget pay ni Dulay a saan laeng a dagiti natataengan ken addaan sagubanit iti bagi ti matamtamaan iti virus gaputa karaman metlaeng dagiti ubbing.
Imbinglayna pay nga addaan ti ospital iti 150 a bed capacity/kwarto, 110 kadagitoy ket aramaten dagiti COVID patient bayat a dagiti nabatbati ket para kadagiti pasyente nga agsagsagaba ti sabali a sakit.
Kabayatana, agtaltalinaed a fully occupied wenno napunno dagiti kwarto ti kangrunaan a pagagasan iti probinsia kasaruno ti agtultuloy a panagwaras ti COVID-19 iti Benguet.
Inaklon ni Dr. Dulay nga adu dagiti nakapila a pasyente a maisublat iti mabakantean a kwarto nu sadinno nagtaud dagitoy iti Mt. Province ken Ifugao ngem umili dagitoy ti Benguet.
