BAGUIO CITY- Nakasagana ni Benguet Caretaker Cong. Eric Go Yap a sumango iti Senado iti kanito a maimbitaran daytoy iti panagdengeg ti Senate of the Whole Commitee iti isyu ti smuggling kadagiti produkto ti nateng.
Iti interview ti Bombo Radyo Baguio, impeksa ni Kevin See- Chief of Staff ti opisina ti Kongresista a siguden nga adda ti komunikasyon ken kampanya nga araramiden ti opisina ti Benguet Caretaker kontra iti smuggling sakbay pay a pimmudot wenno rimuar manen ti isyu.
Inkalinteganna a saan koma nga iwar-awaras dagiti saan nga umno nga impormasyon ken saan a mapolitika ti isyu ti smuggling nangruna a saan nga aramaten dagiti mannalon kabayatan ti campaign period.
Maipalagip nga iti kaudian a panagdengeg/hearing ti Senado,nangitunda iti diskusyon ti akusasyon ni Senator Cynthia Villar kenni Senate President Vicente Sotto III a nang-bypass kenkuana kas Chairperson ti Senate Committee on Agriculture and Food idi nabukel ti komite a mangtutok iti imbestigasyon ti smuggling kadagiti agricultural products.
Nagbalin pay a nabara ti diskusyon dagitoy idi kinuna ni Sen. Villar a saan nga inimbataran ti panel ni Cong. Yap idinto ta daytoy ti caretaker ti Benguet.
Iti agdama ket agtultuloy ti reklamo ken arungaing dagiti mannalon ti Benguet kontra iti smuggling dagiti produkto ti agrikultura kas iti nateng.
