BAGUIO CITY – Umaw-awat itan ti Benguet State University iti ad-ado pay a bilang dagiti enrollees tapno mapangato populasyon dagiti estudyante iti nasao nga unibersidad.
Iti panakiuman ti Bombo Radyo Baguio, kinuna ni BSU President Dr. Felipe Comila, adda ti direktiba manipud iti DBM a maikonsidera ti BSU kas ‘small university’ gaputa addaan laeng daytoy iti agarup 14,000 nga estudyante.
Nupay kasta, kinuna nga ita a manarimaan ti enrollment ket maar-artapan ti 14,000 a bilang dagiti estudyante isut gapuna a mabalinen a maikonsidera ti BSU kas medium university.
Kabayatanna, imbinglay ni Dr. Comila a mangilukat dagitoy iti tallo pay a campus partikular sadiay Kapangan ken Kabayan ita a tawen ken sadiay Itogon inton umay a tawen.
Impettengna a babaen iti daytoy ket mapalawa ti sakop ti Benguet State University malaksid pay iti Buguias Campus, La Trinidad Campus ken iti Bokod Campus.
