Basbassit ti naawat ti Commission on Elections (Comelec) a report ti vote-buying ken vote-selling iti napalabas nga eleksion.
Sigun iti Comelec Committee on Kontra Bigay (CKB), pakabuklan a 1,126 nga insidente ti vote-buying ken vote-selling ti naipadamag iti poll body para iti eleksion manipod Mayo aginga idi Hunio a singko — basbassit ngem ti 1,200 a naipadamag bayat ti 2022 national elections.
Iti nasao a bilang, 677 ti maipapan iti vote-buying ken vote-selling, ken 227 ti maipapan iti abuse of state resources (ASR).
Ti rehion nga addaan ti kangatuan a bilang ti reklamo ket manipod rehion III, IV-A, NCR, V, ken rehion I.
Patien ni Commissioner Ernesto Maceda Jr., chairman ti Committee on Kontra Bigay a ti panagbaba ti iligal nga aktibidad ket gapu iti nangato a “public awareness,” “enforcement visibility,” ken panagbuteng iti mabalin a “consequences” daytoy.
Maipalagip nga idi Pebrero, kinuna ti Commission on Elections nga isayangkatda ti naing-inget a wagas tapno malapdan ti vote-buying, vote-selling ken malapdan ti abuse of state resources (ASR).
