Baguio City – Dumanon itan iti agarup 500,000 ti bilang dagiti indibidual a naapektaran iti magnitude 7 a gingined a tinmama sadiay Abra idi Hulyo 27.
Sigun iti National Disaster Risk Reduction and Management Council (NDRRMC), daytoy ket gapu iti agtultuloy a panagsangpet dagiti report seknan kadagiti kanayonan nga inbididual a nadangran iti nasao a didigra.
Kinuna ti ahensiya a bukbuklen daytoy ti 133,651 a pamilya manipud kadagiti 1,329 a babbarangay sadiay Regions 1, 2, ken Cordillera Administrative Region.
Agtaltalinaed met a sangapulo ket maysa ti bilang dagiti pimmusay ngem ngimmato iti 567 ti bilang dagiti nadangran manipud iti immunan a 410.
Dumanon met iti 1,310 nga indibidual wenno 368 families ti agnanaed kadagiti 20 nga evacuation centers.
Malaksid iti daytoy, dumanon met iti pakabuklan nga 33,861 dagiti nadadael a babbalay sadiay Regions 1, 2, CAR, ken National Capital Region.//Alfred Pudsoc
