BAGUIO CITY – Dumanon ita iti innem ti bilang dagiti pimmusay gapu iti dengue manipud iti agarup 3,300 a nailista a suspected cases ti dengue ditoy Cordillera Region iti umuna a kagudua ti agdama a tawen 2019.
Nupay kasta, kinuna ni Dr. Jennifer Joyce Pira, Medical Officer IV ti Department of Health (DOH) – Cordillera a namnamaendan ti posiblidad a ngumato pay ti bilang dagiti kaso ti dengue gaputa panagtutudo ita ken no ibasar metlaeng iti five-year case study.
Naamuan a manipud Enero 1 agingga Hulyo 13 ket agarup 3,300 ti bilang dagiti kaso ti dengue ditoy Cordillera, nangatngato iti 31% no idilig iti dumanon 2,500 a kaso ti dengue iti kapada a panawen idi 2018 a nakatayan ti uppat nga indibidual.
Sigun iti DOH-Cordillera, ita a tawen ket nailista dagiti pimmusay gapu iti dengue sadiay Benguet, Baguio City, Mountain Province ken non-Cordillera.
Nailista ti panagngato ti kaso ti dengue kadagiti probinsia ti Ifugao, Mountain Province, Apayao, Benguet ken Abra bayat a nailista ti panagbaba ti kaso ti dengue ditoy Baguio City ken Kalinga.
Sigun met kenni DOH-Cordillera OIC Regional Director Dr. Amelita Pangilinan, awan pay iti makapa-alarma a lebel ti panagngato ti kaso ti dengue iti rehiyon ngem inirtengandan ti panagwanawan ken panangital-oda iti panagridam ti publiko.
Kinunana a nainget ti panangipasiguradoda iti kaadda dagiti dengue fast lanes kadagiti parapubliko ken pribado a health facilities ditoy rehiyon.
Agtultuloy pay ti panangipalagipda iti publiko iti panagsurot dagitoy iti amin a pammilin ken pagalagadan para iti panakaliklik ti dengue.
Nakasagana metten dagiti kasapulan a logistics ti ahensia a mabalin a maiwaras iti publiko kas iti drum net covers, insecticides, dengue rapid test kits, long lasting insecticide treated nets ken dadduma pay.
Maipalagip nga idi napalabas a lawas ket indeklara ti DOH Central Office ti nationwide dengue alert gapu iti nangato a kaso ti dengue iti pagilian. (with Bombo Brigitte Marcasi)
