LA TRINIDAD, BENGUET- Bimmaba ti bilang dagiti simmangpet a Farmer’s truck iti Benguet Agri-Pinoy Trading Center (BAPTC) idi September 22 agingga September 24, 2025 kabayatan ken kalpasan ti panagdalapus ti Bagyo a Nando.
Iti interview ti Bombo Radyo kenni Octavia Abalos, Officer-in-Charge ti Trading Operations Division ti BAPTC, kinunana a 59 a farmer’s truck ti simmangpet idi Martes, nababa no idilig iti 96 idi Lunes.
Nupay kasta, ngimmato iti 101 idi September 24.
Kabayatanna, bimmaba met dagiti Traders a mangitultulud iti nateng kadagiti nagduduma a market outlets.
Sigun kenni Abalos, bimmaba iti 46 idi September 22 ken 31 idi Martes, September 23.
Nupay kasta, ngimmato metlaeng daytoy iti 39 idi September 24.
Kabayatanna, nagduduma a nateng ti naisangpet dagiti nasao a bilang dagiti Farmer’s truck a pakairamanan ti Carrot, Sayote, Repolyo, Radish, Patatas ken dadduma pay.
Sigun iti nasao nga Officer-In-Charge ti nasao a Trading Center, sadiay Mankayan, Buguias, Bakun, Bauko, ken Tinoc, Ifugao ti Top 5 a pagtataudan dagiti nateng sadiay BAPTC.
Impanamnamana met a natalged ken presko amin dagiti nateng a maisangsangpet sadiay BAPTC. //mp4
