BAGUIO CITY – Dumanon ita iti 38 ti bilang ti kaso dagiti baro a variants ti COVID-19 iti siudad ti Baguio.
Sigun kenni City Health Officer Dr. Rowena Galpo, kasaruno daytoy ti panakaduktal ti kanayonan a siyam a kaso ti B117 wenno UK variant ken dua a B 1351 wenno South African variant ti COVID-19 ditoy siudad babaen iti Philippine Genome Center.
Kinunana a dagiti nakaptan iti nasao a variant ket agtawen ti dua agingga walopulo ket pito ken bukbuklen daytoy ti 24 a babbai ken 14 a lallaki.
Dinakamatna a posible nga agpayso ti pammati ni Mayor Benjamin Magalong a nasuroken iti 100 ti kaso ti UK variant ken nasuroken iti 10 ti kaso ti South African variant kas maibasar iti killaat a panagngato iti kaso ti COVID-19 a napasaran ti siudad kadagiti napalpalabas a bulan.
Inlawlawag ni Dr. Galpo a daytoy ket gapu iti naduktalanda a naparpartak a panagwaras ti COVID-19 iti siudad no idilig iti napalpalabas nga awan ti dadduma a variant ti nasao a sakit ditoy pagilian.
Naamuan a karaman dagiti siyam a baro a kaso iti dadduma a variant ti COVID-19 kadagiti clustered cases a nabigbig iti napalpalabas a bulan.
Agtultuloy met ti contact tracing ken dadduma a preventive measures tapnu maisardengen ti panakaiyakar ti coronavirus ditoy siudad.
Kinuna ni Dr. Galpo a ti paylaeng panagsuot iti face mask ken face shield, panagsurot iti physical distancing, umno a panag-ugas iti ima ken panagliklik iti adu a tattao ti kasayaatan a panglapped iti panagwaras ti COVID-19.
