BAGUIO CITY – Maibalbalakad ti panagannad ken panag-alerto dagiti umili nga agnanaed iti baba ti Ambuklao Dam sadiay Bokod, Benguet ken Binga Dam sadiay Itogon, Benguet kagiddan ti panagibulos dagitoy iti danum gapu iti agtultuloy a panagngato ti lebel ti danum kadagiti nasao a water reservoir.
Maipalagip nga idi kalman ket nangrugi ti panangibulos ti Binga Dam iti danum babaen iti panangilukatda iti maysa a gate daytoy ken naituloy manen ita nga aldaw a giniddanan ti Ambuklao Dam a nangilukat met ti maysa a gate daytoy.
Maibasar iti datus, dandanin madanun ti lebel ti danum iti Ambuklao Dam ti 752 meters above sea level a Normal High Water Level daytoy bayat a dandani madanun ti lebel ti danum iti Binga Dam ti 575 meters above sea level a Normal High Water Level daytoy.
Agpada met a sag-kagudua a metro ti kangato ti gate dagitoy a nailukat a rumwaran ti danum nga agayos iti masakupan ti Agno River.
Maipalagip a ti danum iti Ambuklao Dam ket agayos iti Binga Dam ken ti danum iti Binga Dam ket agayos iti San Roque Dam sadiay San Manuel, Pangasinan.
