![](https://img.bomboradyo.com/baguio/2019/09/hall-of-fame-1.jpg)
BAGUIO CITY – Nabigbig kas Hall of Famer ti Bombo Radyo Baguio kadagiti blood galloners club, members ken partners ti Philippine Red Cross (PRC)-Baguio Chapter.
Impaay ti PRC-Baguio Chapter ti plaque iti Bombo Radyo Baguio kas panangbigbig iti dakkel a kontribusyon ti istasyon iti panakaital-o ti boluntaryo a panangidonar iti dara para iti panakamintinir ti umdas ken de kalidad a suplay ti dara iti lokalidad.
Nailanad iti pammigbig nga addaan ti Bombo Radyo Baguio iti pakabuklan a kontribusyon a dumanon iti 2,293 units ti dara iti uneg ti 16 a tawen manipud idi 2003.
Naur-or dagiti nasao a dara babaen iti tinawen a Dugong Bombo ti Bombo Radyo Philippines a maysa kadagiti kangrunaan a social responsibility ti network para kadagiti agkasapulan a kailyan.
Personal nga inawat ni Bombo William Luczon, station manager ti Bombo Radyo Baguio ti nasao a pammadayaw nga impaay ti PRC-Baguio Chapter.
Malaksid iti Bombo Radyo Baguio, napadayawan met dagiti dadduma nga indibidual gapu iti agtultuloy a panangidonarda iti dara para kadagiti agkasapulan.
Kabayatanna, indanun ni Baguio Mayor Benjamin Magalong ti nalaus a panagyamanna kadagiti volunteers iti panangidonar dagitoy iti dara para kadagiti agkasapulan.
Kinunana a gaputa awan iti pondo a maipapaay iti PRC babaen iti gobyerno ket guyguyuguyenna met dagiti dadduma a kompanya iti panangidonar dagitoy iti aniaman a gatad tapnu makatulong iti blood bank. (-with Bombo Nikki Agsiweng)