Nangipila ni sigud a Senator Bong Revilla iti counter-affidavit seknan iti kaso a graft a naipila kontra kenkuana a maatap nga adda ti pakainaiganna iti naanomalyaan a flood control projects.
Personal nga isumitir ni Revilla daytoy iti Department of Justice(DOJ) idi kalman.
Sigun iti abogado ni Revilla a ni Atty. Francesca Señga, malaksid iti counter-affidavit ket nangisumitir metlaeng daytoy kadagiti ebidensya a mangpaneknek nga amin a nilaon iti akusasyon ken reklamo kontra iti daytoy ket pasig a kinaulbod.
Innayon ti abogado a mangnamnama ni Revilla nga agbalin a patas ti panangtingiting ti Department of Justice kadagiti ebidensya.
Maipalagip a nairaman ni Revilla kadagiti naakusaran a nakaawat iti minilmilyon a kwarta a naipatulod iti pagtaenganna.
Partikular iti daytoy ti dinakamat ni sigud a Department of Public Works and Highways (DPWH) undersecretary Roberto Bernardo nga inpatuludanna ni Revilla iti ₱125 million idi December 2024 ken sabali pay a ₱250 million sakbay iti 2025 elections.
Nupay kasta, nainget a kinuna ti sigud a senador nga inuulbod amin daytoy.
