Rumrumwar a breach of safety protocol ti rason ti pannakatnag iti elevator ti janitorial leadman iti SM City Baguio a ni Robin Esguerra.
Iti panangala ti Bombo Radyo iti datos ti kaudian nga imbestigasyon dagiti kapulisan, imbinglay ni Baguio City Police Office- City Director Police Colonel Ruel Tagel a rimwar a nakarekep ken nakalock ti ridaw ti elevator iti nasao a mall ngem sinukit ken pwersaan a nilukatan daytoy ni Esguerra.
Kasaruno dayta, saan a nakita ti janitor leadman nga awanan iti floor ti elevator car rasona natnag daytoy.
Sigun pay kenni PCol. Tagel, rimwar iti resulta iti otopsiya a ti rason iti ipupusay ni Esguerra ket blunt trauma injuries to the head, thorax, ken abdomen
Mainaig iti dayta, nangipatungpal metaleng ti imbestigasyon dagiti kameng iti City Buildings and Architecture Office ken ti Department of Labor and Employment-Cordillera babaen iti pannakikoordinarda iti kameng iti pulisya.
Kabayatanna, awan met ti criminal liability iti nasao a mall gapu ta awan ti krimen a napasamak ken nalawag nga aksidente daytoy.
Nupay kasta, impetteng ni PCol. Tagel a responsibilidad ti mall a mangisayangkat iti regular nga orientation seknan iti safety protocols para kadagiti empleyado tapno maliklikan dagiti kapada nga aksidente
Insingasingna pay a masapol ti mall nga ad-adda nga ingetan dagiti safety protocols dagitoy ken siguradwen nga agtultulnog dagiti empleyado.
Kas paset ti panagregget ti Baguio City Police Office, impasigurdo ni PCol. Tagel a palagipan dagiti indibidwal nga agan-annadda ken agtulnogda kadagiti pagannurutan dagiti lugar a bisitaenda tapno maliklikan ti panakapasamak dagiti saan a nasayaat nga insidente.//Bombo Jez Lapizar
