Nangipaay ti statement ti Benguet State University kalpasan ti damag a naipakaamo a sumagmamano kadagiti teaching personnel dagitoy babaen iti Contract of Service ket saan pay a naipapaay ti sweldoda a nangrugi idi napalabas a bulan agingga iti agdama.
Sigun iti pagadalan, maawatanda ti epekto ti panakaitantan ti panakaipaay ti sweldo dagitoy rason nga agkidkiddawda iti panakaawat dagitoy.
Nopay kasta, siraragsak nga impakaamo ti nasao a pagaadalan a ti sweldo dagiti personnel ket nakasaganan para iti panakairelease daytoy.
Impanamnamada met nga ar-aramiden ti nasao a unibersidad ti kabaelanda tapno marisut dagiti nasao a pakaseknan.
Maipalagip a sumagmamano kadagiti teaching personnel babaen iti Contract of Service ti nangipakaammo a ti naudi a nagsweldoanda ket idi bulan ti Enero ngem kadagiti simmarsaruno a bulan ket saan pay a naipaay ti sweldoda rason a marigatan dagitoy iti financial nga aspeto.
Gapu iti dayta, sumagmamano ti nang-aklon a kinasapulanda ti agutang tapno adda laeng ti aramatenda.
Iti agdama, dumanon iti 334 a teaching staff ken 346 a non-teaching staff ti agtratrabaho babaen iti Contract of Service iti main campus ti Benguet State Univesity sadiay La Trinidad, Benguet ken saan a karaman ditoy dagiti daduma a campus.
