BAGUIO CITY – Maragsakan ken ipampannakel ni Baguio City Mayor Benjamin Magalong ti nagun-od dagiti atleta ti siyudad iti kalleppas a 2024 Cordillera Administrative Region Athletic Association (CARAA) meet sadiay Apayao.
Kagiddan dayta ti panag-awat dagiti atleta a nangibagi iti siudad ti pammadayaw ken trophy bayat ti flag raising ceremony iti City hall.
Guyguyugoyen pay ti Mayor iti Department of Education – Cordillera nga itrain da pay dagiti coaches ken trainers iti nagduduma a probinsiya iti rehiyon tapno makarit pay dagiti atleta ken agmaymaysa a dumur-as iti tay-ak iti ay-ayam.
Kabayatanna, naipanamnama nga agtultuloy ti suporta nga ipapaay ti city government kadagiti atleta ti siudad babaen iti panakanayon ti cash reward dagitoy kas maitunos iti pagannurotan ti siudad.
Innayon pay ti mayor nga adda ti naisayangkat a hearing maipapan iti nasao a pagannurotan ken agtultuloy ti deliberasyon ti city council.
Maipalagip a pakabuklan a 236 a medalya ti naiyawid ti siudad manipud iti kalepps a torneo.//Bombo Jez Lapizar
