![](https://img.bomboradyo.com/baguio/2019/12/panagbenga.jpg)
BAGUIO CITY – Awan pay ti kumpirmasyon manipod iti Baguio Flower Festival Foundation Incorporated (BFFFI) ken ti lokal a gobierno ti Baguio City no matuloy wenno saan ti nalatak a Panagbenga Festival inton sumaruno a tawen.
Sigun kenni City Tourism Officer Engr. Aloysius Mapalo, pagsaritaan paylaeng daytoy ti dua a benneg nangruna ta adda latta ti COVID-19 ditoy pagillian.
Kinunana a no agballigi ti Creative Festival nga Ibagiw 2020 ti siudad ket posible wenno manamnama nga adalenda no anya dagiti maiyaplikar iti posible a panakarambak ti Panagbenga inton February 2021.
Dinakamatna nga adda met ti nasursuroda iti panakaisayangkat dagiti nagduduma nga aktibidad babaen iti virtual wenno online ken ti panangliklik kadagiti aktibidad a maka-allukoy ti adu a tattao.
Nupay kasta, kinunana nga iti kanito a maituloy ti Panagbenga 2021 ket dakkel ti pagbaliwan ti wagas iti panakaisayangkat daytoy.
Maipalagip a gapu iti pangta ti COVID-19 ket nakanselar ti selebrasyon ti Panagbenga ita a tawen bayat a kadagiti maudi a bulan ti tawen ket agsagsaganan ti lokal a gobyerno ken ti BFFFI para iti panakaisayangkat ti festibidad iti sumaruno a tawen.