Puntiria ti Commission on Elections (Comelec) a mapataud ti 1.5 milion a balota iti tunggal aldaw gaputa ituloyda manen ti panagimprenta para iti 2025 national and local elections inton Lunes.
Iti baet a nababa ti oras ti Commission on Elections (Comelec) para iti panagimprenta kadagiti official ballots, inaprobaran ti Comelec En Banc ti panagngato ti pakabuklan a panagpataud ti balota, kas maibasar iti resolusion a naipulog.
Maipalagip a naitantan ti panagimprenta gapu kadagiti panagbalbaliw babaen ti temporary restraining order nga impaulog ti Korte Supreme.
Prayoridad ti nasao nga ahensia dagiti sumaganad a lugar wenno aktibidad a kas ti mock elections, panagbotos iti ballasiw-taaw, final testing ken sealing, Local Absentee Voting, Caraga, Region I, II, III,V XII, Bangsamoro Administrative Region in Muslim Mindanao, ken iti Cordillera Administrative Region.
Indeputy ti Comelec ti National Printing Office (NPO) tapno masigurado ti nasayaat, makapnek, ken naintiempuan a pannakaileppas ti pannakayimprenta manen dagiti opisial a balota.
Naitantan ti panagimprenta kasaruno ti pannakaipaulog ti Korte Suprema iti baro a temporary restraining orders (TROs) kontra iti pannakadiskwalipikar kadagiti sumagmamano nga “aspirants” wenno agngayangay.
Sigun kenni Comelec chairperson George Garcia, tunggal naimprenta a balota ket aggatad ti P22 tunggal pidaso nu sadinno, “useless” ti innem a milion a balota a saan a maaramat nga aggatad iti agarup P132 million.
Iti tengga a naitantan, impasigurado ni Garcia a maituloy latta ti panagbotos inton Mayo a dose.
