BAGUIO CITY – Mangisaysayangkaten dagiti otoridad iti contact tracing kadagiti nakasangsango ti maysa a 2019 novel coronavirus (2019-nCoV) patient under investigation (PUI) a na-confine ita iti isolation room wenno delta ward ti maysa nga ospital ditoy Baguio City.
Iti interview ti Bombo Radyo Baguio kenni City Health Officer Dr. Rowena Galpo, kinunana a naikonsidera a PUI ti nasao a pasyente kalpasan a nakwalipikar ti sitwasyonna kadagiti criteria iti case definition ti nCoV.
Sigun kenkuana, nakita iti pasyente dagiti sintomas a gurigor ken panag-uyek malaksid nga addaan daytoy iti pakasaritaan ti panagbiahe sadiay Hong Kong.
Dinakamatna a naipatuloden dagiti naala a samples iti pasyente iti Research Institute for Tropical Medicine para iti kumpirmasyon ti kaso.
Gapu iti daytoy, umap-apela ni Dr. Galpo kadagiti nagbiahe paturong sadiay China, Hong Kong ken Macau ken naaddaan ti gurigor ken uyek iti uneg ti 14 nga aldaw tapnu dagusda nga agpataming kadagiti health facilities wenno ospital.
Kabayatanna, kinuna met ni Benguet Provincial Health Officer Dr. Nora Ruiz a kas maibasar iti imbestigasyonda ket siguden nga addaan iti panateng ti nasao a sakbay pay a napan nagbakasyon sadiay Hong Kong idi January 24-27.
Innayonna nga idi nagsubli ti nasao a pasyente ket ad-adda a kimmaro ti kasasaad daytoy gaputa nakapasar iti panag-uyek ken on-and-off a gurigor.
