Nagbalinen ti Coronary Syndrome a kangrunaan a sakit a mangituntunda ti ipupusay dagiti umili iti probinsya ti Benguet.
Sigun kenni Dr. Cham Bacuso, Medical Specialist 1 ken Public Health Programs Head ti Provincial Health Office-Benguet, sigud a dagiti pulmonary diseases ti kangrunaan a mangituntunda iti ipupusay dagiti indibidwal kadagiti napalabas a tawtawen ngem iti agdama ket maikatlo laengin daytoy.
Maibasar iti rekord ti nasao nga opisina, maikadua ti sakit a cancer kadagiti kangrunaan a sakit a rason ti ipupusay dagiti indibidwal, maikapat ti cerebrovascular diseases, bayat a maikalima met ti diabetes ken dagiti komplikasyon daytoy.
Sigun kenni Dr. Bacuso, kangrunaan a makaituntunda ti ipupusay dagiti umili iti Benguet dagiti non-communicable wenno dagiti saan a makaakar a sakit.
Gapu iti dayta, impaganetget ti doktor ti kinapateg ti nasayaat a lifestyle para iti nasaysayaat metlaeng a kasasaad ti pammagi ken ti panangliklik kadagiti nadakamat a sakit.//Bombo Rob Dominguez
