BAGUIO CITY – Nakaipaayen ti Department of Labor and Employment (DOLE)-Cordillera iti P10 million a gatad ti Tulong Panghanapbuhay sa Ating Disadvantaged / Displaced Workers (TUPAD) iti nagduduma a paset ti rehion.
Iti interbyu ti Bombo Radyo ken ni Exequiel Ronnie Guzman, regional director ti DOLE-Cordillera, kinunana a nagnumar iti programa ti nasurok 1,140 nga apektado nga empleado ditoy siudad ti Baguio; nasurok 1,260 sadiay Bangued, Abra; nasurok 250 sadiay Manabo, Abra ken dadduma pay a paset ti rehion.
Kinunana a nagtrabaho dagiti apektado nga empleado iti bukodda a balay wenno iti komunidad iti las-ud ti sangapulo nga aldaw ken nakaawatda iti kompensasyon a katukad ti minimum a sueldo ditoy rehion.
Dinakamatna a manarimaan ti pannakaiproseso ti sabali pay a batch dagiti agnumar iti TUPAD Program.
Kinunana a naisumitiren iti central office ti DOLE dagiti kanayonan a proposal para iti nasao a programa.
