BAGUIO CITY – Agtitinnulong dagiti Pilipino sadiay Cambodia ita a panawen ti krisis gapu iti health emergency.
Iti interbyu ti Bombo Radyo ken ni Ana Mae Sabelo, maysa a Pinoy teacher sadiay Cambodia, kinunana nga adda ti grupo dagiti Pilipino a mangipatpatungpal iti donation drive.
Kinunana a dagiti maur-urnong a donasion ket maipapaay kadagiti Pilipino iti nagduduma a paset ti Cambodia.
Dinakamatna nga aktibo met laeng ti Embahada ti Pilipinas sadiay Cambodia a tumultulong kadagiti Pilipino ken maipaspasidong iti repatriation dagiti agtartarigagay nga agawid nangruna dagiti napukawan iti trabaho.
Mainaig iti daytoy ket kinuna ni Sabelo nga awan ti Pinoy nga agparparikot iti renewal ti visa dagitoy sadiay Cambodia.
Impannakkelna a dakkel ti panagraem dagiti Combodians kadagiti Pilipino gapu iti kina-laing dagitoy isut gapuna a maipatpateg dagiti Pinoy sadiay, saan a kas iti dadduma a pagilian.
Dinakamat pay ni Sabelo nga agtultuloy ti istrikto a pannakaipatungpal dagiti pagalagadan kontra iti COVID-19 sadiay Combodia.
Maibasar iti listaan, dumanon laeng iti nasurok 120 ti kaso ti COVID 19 ken nasurok 90 ti nagimbag, bayat nga awan pay ti pimmusay manipud iti nasao a sakit sadiay Cambodia.
