BAGUIO CITY – Nangipila iti petisyon ti asosasyon dagiti volunteer garbage collectors ditoy Baguio City iti General Services Office para iti panakaipaay ti allowance kadagitoy kabayatan ti manarimaan nga enhanced community quarantine.
Sigun kenni Felizardo Ah-ul, dadaulo ti nasao nga asosasyon, kikiddawenda laeng ti panakaited ti allowance kadakuada nga uray ita laeng a panawen ti krisis gapu iti COVID-19.
Inlawlawagna nga awan ti pagalaanda ita iti para iti pamilyada nangruna ta nakarikep met dagiti junk shops a pangilaklakuanda kadagiti recyclable materials a mau-urnong dagitoy.
Innayon ni Ah-ul a tarigagayda pay a kiddawen ti panakarebisa ti waiver a pinirmaan dagitoy, dua a tawenen ti napalabas, kas volunteer garbage collectors ti Baguio.
Sigun kenkuana, kayatda a mailanad iti waiver a no adda ti mapasamak kadakuada kabayatan ti panangkolektarda kadagiti basura iti siudad ket adda ti maawatda a tulong manipud iti lokal a gobyerno.
Nailanad iti nasao a waiver a no adda ti mapasamak kadakuada kabayatan ti panagkolektarda iti basura ket awan ti sungbatan ti lokal a gobyerno. – report from Bombo Brigit Marcasi
