BAGUIO CITY – Nasuspindir ti serrek iti amin a lebel wenno tukad kadagiti parapubliko ken pribado a pagadalan iti probinsia ti Benguet kas nailanad iti Executive Order No. 2019-013 nga impaulog ni Governor Melchor Diclas.
Nangrugi ti suspension ita a malem agingga inton March 22.
Paset daytoy ti precautionary measure ti probinsia kontra iti COVID-19 ken resulta daytoy ti rekomendasyon ti Inter-Agency Corona Virus Infectious Disease 19 Task Force Benguet.
Naibilin metlaeng ditoy ti pananggundaway dagiti school officials ken administrators iti nasao a suspension tapnu isayangkatda ti panag-sanitize ken panag-disinfect kadagiti silid pagadalan ken pasilidad dagitoy.
Naituding pay a ti graduation rites iti probinsia ket inton April 13-17.
Malaksid iti daytoy, napagnumuan ti task force a dagiti 17 nga available rooms iti Benguet General Hospital ti agserbi a quarantine facility para iti entero a probinsia.
Napagnumuan pay a mabalin a maimplementar ti travel ban kadagiti government officials iti probinsia ken suspension kadagiti LGU-led meetings ken activities.
Impaulog met ni Governor Diclas ti Executive Order No. 2020-14 a nangsuspindir iti amin a tourism events, crowd-drawing activities, pakairamanan ti operasyon dagiti restobars ken karaoke bars iti probinsia nga epektibo ita nga aldaw, March 13 agingga April 10.
Balbalakadan pay ni Governor Diclas dagiti residente iti Benguet iti saan dagitoy a panagturong kadagiti nagduduma a lugar iti ruar ti probinsia kas panag-annad kontra iti coronavirus.
