BAGUIO CITY – Nakaron ti epekto ti COVID-19 kadagiti mannalon sadiay Bahong, La Trinidad, Benguet.
Iti panakipatang ti Bombo Radyo Baguio kenni Bahong Punong Barangay Belmer Elis, kinunana a makapasangit ita ti mapaspasaran dagiti cutflower growers iti nasao a lugar.
Inlawlawagna a daytoy ket gapu ta awan ti maaramidan dagiti mannalon no di ti buyaenda laengen nga ag-mature unay wenno madadael dagiti mulada a sabong.
Kinunana nga uray apiten dagiti mannalon dagiti sabong ket awan met laeng ti aggatang kadagitoy gapu ta suspendido met dagiti kasar, panagtitipon, aktibidad iti simbaan ken dadduma pay a pakaaramatan iti sabong.
Innayonna a parikot met laeng dagiti cutflower growers ti pagbayad dagitoy iti inutangda nga inaramatda kas kapital iti panagmulada.
Dinakamat ni PB Elis nga iti agdama ket agtultuloy ti assessment tapno maammuan no mano ti bilang dagiti apektado a mannalon ken no mano ti gatad dagiti nadadael a mula dagitoy.
Impanamnamana pay a kalpasan ti parikot iti COVID-19 ket agtitinnulong dagiti opisial ken dagiti mannalon tapno makabangon dagitoy.
