BAGUIO CITY – Inyapela ni Benguet General Hospital Chief Dr. Meliarazon Dulay ti dagus a panag-self quarantine dagiti amin nga umili ti Benguet a naipasidong ti swab test para iti COVID-19.
Inlawlawagna nga iti kanito a na-swab test ti maysa nga indibidwal ket karaman daytoy kadagiti suspek wenno mapagat-atapan nga addaan ti COVID-19.
Kinunana a kabayatan ti panaka-uray ti resulta ti swab test ket nasken nga ag-home quarantine dagiti maseknan ken saanda a rumwar wenno sumrek iti trabaho.
Innayonna a ti saan a panagtungpal dagiti maseknan iti nasao a pagaladagan ti posible a maysa kadagiti rasun nu apay nga umad-ado ti maak-akaran ti virus ti COVID-19 nangruna no asymptomatic iti COVID-19 ti nakaptan.
Kiniddaw pay ni Dr. Dulay ti panagtungpal dagiti amin nga umili iti minimum public health standard ken saanda nga iyaleng-aleng ti COVID-19.
