BAGUIO CITY – Tarigagay ti Barangay Dalupirip ken Barangay Tinongdan sadiay Itogon a maisina dagitoy manipud iti 13 a munisipyo ti Benguet tapnu agbalinda a maysa a munisipyo.
Sigun kenni Tinongdan Punong Barangay Edwin Atumpag, kidkiddawenda ti panang-sponsor ni Benguet Representative Nestor Fongwan Sr. iti gakat para iti nasao a tarigagay.
Kinunana a tarigagayda metlaeng a maawagan iti ‘Colos’ ti agbalinto a munisipyo a buklen ti Tinongdan ken Dalupirip.
Imbinglayda a nabayagen a tarigagay dagiti umili iti dua a barangay ti maaddaan iti bukodda a pakabigbigan nangruna iti tay-ak ti tradisyon ken kultura.
Nailanad iti binukelda a resolusyon a ti Tinongdan ken Dalupirip ket kwalipikado nga agbalin a munisipyo iti benneg ti land area ken populasyon.
Puntirya pay ti tarigagayda a masalwadan ken maipreserba ti cultural identity dagitoy ken ti aglawlaw sadiay malaksid pay a mabukel ti kanayonan nga oportunidad para kadagiti residente sadiay iti tay-ak ti empleyo, pagbiagan, panagdur-as ken dadduma pay.
Maibasar iti kaudian a datos ti Philippine Statistics Office – Cordillera, maikadua ti Itogon iti kaaduan ti populasyon iti probinsia ti Benguet a dumanon iti 60,000. (-with Bombo Florence Paytocan)
