BAGUIO CITY- Dumanon iti agarup P18 Million ti danyos iti napasamak nga uram iti Maharlika Livelihood Complex iti siudad ti Baguio.
Mainaig iti dayta, mapatta-patta a dumanon iti 1,500 square meters ti nauram.
Iti pannakiuman ti Bombo Radyo Baguio kenni SFO1 Lloyd Ashley Furigay, kinunana a narigatan ti Bureau of Fire Protection (BFP) iti panangsebseb iti apoy gapu iti napuskol nga asuk.
Malaksid iti dayta, sinigurado da a natalged ken saan nga agwaras ti uram.
Gapu iti napuskol nga asok, nagaramat da iti Smoke Ejector.
Sigun pay iti nasao nga opisial, kaadduan kadagiti nauram ken pakairaman dagiti light materials kas iti lupot ket dadduma pay.
Kaaduan kadagiti stalls iti basement ket nauram, nangruna ket nagdedekket dagiti nasao nga stalls.
Impetteng ni SFO1 Furigay a sukimaten paylaeng dagiti structural engineers, no natalged ti basement a nakaserra agingga iti agdama.
Kinompirmar ti nasao opisial nga awan ti pimmusay ken nadangran nga indibidual iti napasamak nga uram.
Iti agdama, manarimaan paylaeng ti imbestigasion dagiti otoridad iti rason ti napasamak nga uram.
Maipalagip a naitawag iti BFP ti uram idi September 06 iti 9:11 PM.
Fire under control ti 3:56 AM ken naideklara a fire out ti 5:04 AM idi September 07, 2025.
Kabayatanna, agpalpalagip ni SFO1 Furigay iti publiko nga itawag a dagos no adda ti mapasamak nga uram iti hotline number da a 442-222 ken iti 911.
Innayonna a kanayon nga ikkaten dagiti nakasaksak nga appliances no rumwar; ipasukimat dagiti electrical wirings ti balay; suruan dagiti annak a saan nga agay-ayam ti matchstick ken lighter; kanayon nga ikkaten dagiti nakasaksak a saan a maar-aramat nga appliances no adda iti pagtaengan.//mp4
