BAGUIO CITY – Pimmaut iti pito agingga walo nga oras ti panaka-uram ti basement ti maysa a supermarket ken hardware store sadiay Magsaysay Avenue, Baguio City idi kalman sakbay a naideklara ti fire out.
Immuna a naawat ti Baguio City Fire Station ti paka-ammo seknan iti uram iti alas nuebe ti agsapa ken nabaelanda a nasebseban ti uram iti alas singko ti malem.
Sigun kenni Baguio City Fire Marshall Nestor Gorio, dimmanon iti fourth alarm wenno maikapat nga alarma ti uram.
Kinunana a nagaramatda ti jack hammer iti datar ti basement ti hardware store tapnu laeng mapasardeng ti panagwaras ti apoy.
Naduktalan iti inisyal nga imbestigasyon a maysa a junk pit ti basement ti hardware store ken saan a koma a rumbeng a maaramat kas pagpunduan kadagiti pintor, tiner ken dadduma pay a kagawaan ti hardware.
Suksukimaten ita ti Baguio City Fire Station ti gatad dagiti nauram a kagawaan ken ti posible a rason ti pannakauram ti nasao a paset ti establishimiento.
