Addan iti kustodiya ti Criminal Investigation and Detection Group-Baguio ti suspect iti uram a napasamak idiay Purok 7, Sunnyside, Fairview barangay idi napan a lawas a nakaitunda ti danyos a mapatta-patta a dumanon iti P750,500.
Sigun kenni Senior Fire Officer 1 Lloyd Ashley Furigay, pannakangiwat ti Bureau of Fire Protection- Baguio, nabigbig ti suspect babaen kadagiti complainant nu sadino, napilaanen daytoy ti kaso nga arson.
Agtawen daytoy ti uppat a pulo(40),naasawaan,construction worker, ken residente ti lugar a nakapasamakan ti uram.
Sigun met iti Baguio City Police Office-Police Station 1 bayat ti panakiumanda iti testigo, imbinglay ti katugangan ti suspek nga immunan nga inuram daytoy dagiti kawesna iti ruar ti pagtaenganda ngem inanawa daytoy dagiti bayaw ken karrubada. Kalpasan dayta, inuram pay ti suspect ti sofa iti uneg ti pagtaenganda nu sadino, dagus a timmaray daytoy idi nakitana a nagramaram ti uram.
Sigun met kadagiti karuba ti suspect, nakitada timmaray daytoy kalpasan a nagramaram ti uram ken nangeganda nga impukkawna ti “mamatay kayong lahat” sakbay a pimmanaw.
Kabayatanna,imbinglay met ti pamilya,kabagyan,ken katugangan ti suspect a panagimon ken panakaunget ti rason nu apay nga inuram ti suspect ti pagtaenganda a nakairamanan dagiti daduma pay a balay.
Kagiddan ti panagsebseb dagiti kameng ti Bureau of Fire Protection (BFP) iti nasao nga uram, naipatungpal ti follow-up seknan ti lokasyon ti suspect a nasarakan idiay Lagoon Area, Lourdes Subdivision Extension, Baguio City.//Bombo Jez Lapizar
