Nagsagawa ang Department of Agrarian Reform (DAR) – Abra ng pagsasanay para sa mga miyembro ng CZARL Agriculture Cooperative sa Sitio Gayaman, Bazar, Sallapadan, Abra noong Pebrero 26, 2025, sa bisa ng Social Infrastructure Building (SIB) program.
Pinangunahan ni OIC PARPO I / CARPO Lunecia C. Segundo, layunin nitong bigyan ng kaalaman at kasanayan ang mga Agrarian Reform Beneficiaries Organizations (ARBOs), Agrarian Reform Beneficiaries (ARBs), at maliliit na magsasaka upang mapalakas ang kanilang kooperatiba, mapaunlad ang pamumuno, at isulong ang gender-inclusive growth.
Ang pagsasanay ay bahagi ng Project VISTA na nagpapalakas ng value chains para sa mga pangunahing pananim tulad ng kape at kakaw, habang sinisiguro ang pangangalaga sa kapaligiran. Sa lawak na 300 ektaryang taniman ng kape, may malaking potensyal ang Bazar, Sallapadan para sa agribusiness development.
Hinikayat ni Segundo ang mga kasapi ng kooperatiba na patatagin ang kanilang organisasyon upang higit na mapakinabangan ang Project VISTA, na naglalayong pataasin ang kita ng mga magsasaka, lumikha ng trabaho, at palakasin ang kakayahang umangkop sa pagbabago ng klima.
Ang inisyatibang ito ay bahagi ng patuloy na pagsisikap ng DAR na bigyang-lakas ang agrarian reform communities sa pamamagitan ng capacity-building at pagpapaunlad ng value chains para sa mas produktibong agrikultura.
